Soomaaliya waa waddan hodan ah oo leh kheyraad aad u baaxad weyn iyo bulsho u badan dad dhallinyaro firfircoon ah. Kheyraadkan iyo cududaan da’da yar ayaa ah kuwo aan sidii la rabay looga faa’iideysan sababo laxiriira in waddanku la tacaalayo caqabado badan oo la xiriira dhinacyada dhaqaalaha, arimaha bulshada, siyaasadda, deegaanka iyo amniga.  Inkastoo Soomaaliya iyo saaxiibadeeda caalamiga ay sameeyeen dadaalo wadajir ah si wax looga qabto caqabadaha kor ku xusan, haddana waxaa jirta baahi wayn oo loo qabo in dadaaladan loo beddelo kuwo mira dhal ah oo keena horumar waara oo dhaqan-dhaqaale. Si loo gaaro arimaha kor ku xusan ee horutabinta uleh horumarka dhaqan-dhaqaale ee Qaranka, waxaa lagama maarmaan noqotay in la sameeyo jiheyn istaraatijiyadeed (strategic direction) oo leh hiigsiyo cad cad. Hadaba, Xafiiska Ra'iisul Wasaaraha Soomaaliya oo ka jawaabaya baahida loo qabo in la sameeyo Jiheyn istaraatijiyadeed ayaa qabanqaabinaya kulan Aqoon-is-weydaarsi Istaraatijiyadeed ee Golaha Wasiirrada Qaranka. Ujeedada guud ee Aqoon-is-weydaarsigan ayaa ah in la qabto dood cilmiyeed heerkeedu sareeyo oo dhexmarta Golaha Wasiirada Soomaaliyeed oo ay wehliyaan xeeldheereyaal ka kala yimi dalka iyo dibadaba. Aqoon is weydaarisigaan ayaa la filayaa iney kasoo baxayaan aragtiyo cad cad oo lagu mideysan yahay dhanka jihaynta mustaqbalka dalka oo ku salaysan Qorshaha Horumarinta Qaranka (National Development Plan).  Inta uu socdo Aqoon-is-weydaarsigu, dooduhu waxay noqon doonaan kuwo xog ku salaysan iyadoo la isticmaalayo habab casri ah oo lagu ogaanayo waxyaabaha iyo qaababka ugu waxtarka iyo saamaynta badan ee horumarinta qaranka. Sidaas darteed, soo bandhigidda Aqoon-is-weydaarsiga Jiheynta Istiraatiijiyadeed ee Golaha Wasiirada ayaa muhiim u ah jihada Soomaaliya beegsanayso sanadada soo socda iyadoo lagu lafa-gurayo Qorshaha Horumarinta Qaranka iyo Barnaamijka Xukuumadda.